Lurraldeko Ezohiko Informazio Batzordeak HAPO berriaren behin betiko dokumentua onartu du atzo (azaroak 5) goizean, EAJ/PNV, PSE-EE eta PPren aldeko botoekin eta EH Bilduren eta Elkarrekin Podemosen kontrako botoekin.
Planak bere lau ardatz estrategikoei eusten die: 4.471 etxebizitza berri planifikatzea (horietatik 3.044 babestuak, hirutik bi); eta tokiko jarduera ekonomikoa bultzatzea; 14 hektarea, balio erantsi handiko enpresa-jarduera bultzatzeko; Azkorri zaintzea Getxoko aktibo natural gisa; parke, ekipamendu eta hurbileko zerbitzu berriak sortzea 191.600 m²-ko espazio libreetan; bizitzea, lan egitea eta gozatzea posible den Getxo bat sustatuz.
Planak herritarren proposamenak jaso ditu eta aldeko txosten sektorial guztiak ditu, Eusko Jaurlaritzaren Ingurumen Adierazpen Estrategikoa eta Kostalde, Aire Segurtasun, Errepide eta Trenbideen txostenak barne.
Plana funtsezko lau lehentasunen inguruan egituratzen da:
1) 4.471 etxebizitza berri eraikitzea biztanleria gazteenaren premiei aurre egiteko, biztanleria mantendu eta berreskuratzeko helburuarekin, eta kudeaketa-marjina bat geratzea Euskal Autonomia Erkidegoko Lurralde Antolamenduaren Gidalerroek (DOT) adierazitako 4.790 etxebizitzetara iritsi arte.
2) Jarduera ekonomikoa bultzatzea, lotarako hiri-eredua saihestuz eta Getxon bizitzeko, gozatzeko eta lan egiteko aukera emanez.
3) Azkorri Getxoko aktibo natural gisa babesteko apustua: HAPO berriak lurzoruaren % 70-80 bitartean zaintzea aurreikusten du, parke, ekipamendu eta hurbileko zerbitzu berriak sortuz, Juan Cuadrado kaletik haziz.
4) Parke, ekipamendu eta hurbileko zerbitzu berriak sortzea.
Azaroaren 10eko behin betiko onarpenari begira, Getxo irismen handiko hirigintza-plan bat abian jartzeko prestatzen ari da, giza garapen iraunkorraren printzipioekin bat datorrena eta egungo eta etorkizuneko erronkei erantzuteko diseinatua.
